1. Baccalaureus Educationis Honneurs in Kurrikulumstudie (SAKO-nr. 124616)

Waarop fokus die program?  Die BEd Honneurs in Kurrikulumstudie fokus op gevorderde kennis en vaardighede in kurrikulumteorie, -ontleding en -ontwerp.  Studente ontwikkel die vermoë om relevante en innoverende kurrikula te ontwerp, geloofsperspektiewe sinvol te integreer en e-leer-tegnologieë effektief binne digitale onderwysomgewings toe te pas.

Waarom is dit belangrik vir gekwalifiseer opvoeders?  Die program verdiep opvoeders se professionele praktyk deur hulle te leer om 'n kritiese en reflektiewe benadering tot kurrikulumvraagstukke te ontwikkel.  Dit hou studente op hoogte van hedendaagse onderwys- en e-leertendense en bemagtig hulle om ingeligte bydraes tot kurrikulumvernuwing en die bevordering van onderwyskwaliteit te lewer.

Wat kan studente met die kwalifikasie doen?  Die kwalifikasie berei studente voor vir verdere nagraadse studie op meesters- en doktorale vlak binne die vakgebied van hul keuse.  Dit skep ook geleenthede vir kurrikulumleierskap en professionele rolle binne skole, hoër onderwys en breër onderwyskontekste.

Toelatingsvereistes

• ' n Vierjaar- professionele onderwysgraad; OF
• ‘n Toepaslike baccalaureusgraad en ‘n erkende professionele onderwyskwalifikasie; OF
• ‘n Vierjaar- professionele onderwyskwalifikasie, asook ‘n gevorderde diploma in ‘n verwante subveld van die onderwys; EN
• ‘n Minimum gemiddelde punt van 60% vir die bogenoemde voorvereiste verwerfde kwalifikasie

Let asb. op die volgende belangrike inligting:

• Indien ‘n voornemende student oor die voorvereiste kwalifikasie beskik, maar nie ‘n minimum gemiddelde punt van 60% vir hierdie kwalifikasie behaal het nie, kan hy/sy steeds aansoek doen indien hy/sy ten minste 5 jaar se werksondervinding opgedoen het ná werwing van die kwalifikasie.  ‘n Bewys van onderwyservaring moet verskaf word deur middel van ‘n gestempelde briefhoof van die betrokke skool/skole waarin ervaring opgedoen is.
• Studente wat nie ‘n navorsingsmodule op voorgraadse (vlak 7) voltooi het nie, moet ‘n addisionele navorsingsmodule tydens die eerste studiejaar voltooi en die deeltydse opsie kies.
• Toelating van studente vind plaas volgens die kapasiteit van studieleiers en ook na goeddunke van die Toelatingskomitee om te verseker dat voornemende studente oor die nodige akademiese vermoëns beskik wat vir ’n NKR-vlak 8-kwalifikasie vereis word.

Kwalifikasie-inligting

• Minimumvoorvereiste: Baccalaureusgraad
• NKR-vlak: 8
• Minimum tydperk: 2 jaar

Metode van aanbieding

• Die kurrikulum word deur middel van afstandsonderrig aangebied.  Die lesings word weekliks op e-Klas (Aros se amptelike aanlyn leerplatform) beskikbaar gestel.

• Addisionele ondersteuning word deur middel van interaktiewe aanlyn sessies gebied. Tydens hierdie sessies kan u vrae aan dosente stel en verdere toeligting ontvang.  Die sessies word opgeneem en word later op e-Klas vir besigtiging beskikbaar gestel. 

• Dosente en assistente is beskikbaar vir konsultasies via e-pos, aanlyn of op kampus.

• Toetse en eksamens word aanlyn afgelê (Maandag tot Saterdag: tydens die dag of vroegaand). Datums en tye word vroegtydig gekommunikeer.

Koste per jaar in 2027

• Aansoekfooi: R250.00
• Registrasie: R3 500.00 (eerste deposito betaalbaar in Januarie 2027)
• Klasgeld: R50 510.00
• Handboekkoste (ongeveer): R7 500.00

Beskikbare kurrikulums

O503P

Kwalifikasie met onderskeiding

ʼn Student wat ‘n gemiddeld van 75% vir al die kern- en elektiewe modules behaal het, behaal die kwalifikasie met onderskeiding.

Programuitkomste

Ná die voltooiing van hierdie program is dit Aros se verwagting dat ‘n gegradueerde oor die volgende eienskappe en vaardighede sal beskik:

• toon ‘n grondige en wesenlike begrip van die filosofie van die opvoedkunde en van onderrig en leer vanuit ‘n Christelike perspektief;
• toon grondige kennis van, betrokkenheid by en die vermoë om kurrikulum, kurrikulumontwikkeling en kurrikulumontwerpteorieë, -take, -tegnieke en -vaardighede in ‘n opvoedkundige konteks toe te pas;
• pas die filosofiese, epistemologiese en antropologiese grondslag van Christelike kurrikulumteorie op kurrikulumontwikkeling en -evaluering toe;
• voer navorsing uit en lewer krities en analities verslag oor bevindings en aanbevelings; 
• evalueer wêreldwye kurrikulumtendense en vergelyk elemente van kurrikulums van verskeie onderwysstelsels ten einde voorstelle vir eie kurrikulumverbetering aan die hand te doen; en
• toon ‘n ingeligte begrip van die teorie en praktyk met betrekking tot e-leer en assessering in die onderwys.

Kurrikulums

Kurrikulummodulelys